Patien Debata (Hukum Taurat dalam bahasa Pakpak)

Patien Perlebbe

Aku ngo Jahowa Debatamu, nina Debatanta. Mak ndorok meradum aku bakinenmu Debatamu.

Mike Lapatna ?

Bageen ngo : Kennah mbiaren ukurta janah ngkellengen bana posen midah Debata, asa midah nasa silot.

Patien Peduaken

Mak ndhorok gananmu janah mak ndhorok ko mencuman, barang kade sinibanua dates dekket sinibanua tengah  en, sinibagesen lae bang siniterruh tanoh pe, kum gabe sisembahen barang peue uenmu.

Mike Lapatna ?

Bageen ngo  : Kennah i kebiari ukurta Debata janah kennah ngkelleng atenta bana, asa mak ndhorok kita menembah mi sembahen barang mi gana ganaen mengido kenggelluhen isidi nai, janah mak ndhorok ueen begu barang pengulpuk kinagguruen janah mak ndorok pos ate mi ugasen gemgemmen.

Patien Petelluken

Mak ndorok dokenken gerrar Debata mula mak mende dalanna, sikenna hukumna ngo seggen kalak simelancang mi gerarna.

Mike Lapatna ?

Bageen ngo : Kennah ikebiari ukurta Debata, janah kennah ngkelleng ukurta bana, asa ulang kita nggeut menumpahi barang mersumpah sumpah barang merujarujaren mak jadi barang mergerapgap barang sipekulah kulah, merkite gerar Debata; kerna nderrang tersessak dekket ikesusahen dekket ibagasen sodip dekket i pemojimojien ngo sidokenken gerar Debata

Patien Peempatken

Enget kene mo pebadiaken ari Minggu i, ibagesen ennem ari mo bahan kene bahaen ndene, tapi kum ari pepituken i, ari pentadien Jahowa Debatamu ngo i; mak ndhorok ko mahan bahaen kum i ari sisidari i, barang anakmu pe barang berrumu, barang na posomu anak laki, barang na posomu perempuen, bang pinakanmu bang pengisi kuta ndeba pe siroh kiladang mi kutamu.

Kerna ibagasen ennem ari ngo itempa Debata langit dekket tanoh dekket laut dekket sagumanna sinna, nai mentadi ngo ia i ari pepituken i. Kumerna i ngo asa ipasupasu Debata Jahowa ari pentadienna i janah iperbadiai.

Mike Lapatna ?

Bageen ngo : Kennah ikebiari ukurta Debata janah kennah ngkelleng atenta baNa, asa ulang njais ukurta i ajar sinikata Debata nai, kennah mbadia ngo kata Debata iatenta, janah kennah ngkasah kita mendengkohken dekket mengguruken.

Patien Pelimaken

Kennah pesangapenmu ngo partuamu, asa sayurtua ko janah ndekkah nggelluh i tanoh siniberreken Jahowa Debatamu bamu.

Mike Lapatna ?

Bageen ngo : Kennah ikebiari ukurta Debata, janah kennah ngkelleng atenta baNa, asa  ulang pis matanta midah partuanta dekket midah rajanta bang situatua pe, mak jadi perohenta lagana, kennah merandal pekilankonta janah kennah ngkelleng atenta midahsa, siueen ngo katana janah sicubuken ngo ukurta.

Patien Peennemken

Ulang ko memunuh

Mike Lapatna ?

Bageen ngo : Kennah ikebiari ukurta Debata, janah kennah ngkelleng atenta baNa, asa ulang kita nggeut menakit nakiti sinasa singgelluh, kennah ate pegelluhken ngo atenta mi nasa singgelluh.

Patien Pepituken

Ulang ko merlangkah julu meddem.

Mike Lapatna ?

Bageen ngo : Kennah ikebiari ukurta Debata janah kennah ngkelleng atenta baNa, asa kennah matemman ukurta janah rentem dekket pengelakonta bang katanta pe, kum sienggo kendirinken i, kennah mesipehargaen janah mersikekkellengen.

Patien Peualuhken

Ulang ko menangko

Mike Lapatna ?

Bageen ngo : Kennah ikebiari ukurta Debata, janah kennah ngkelleng atenta baNa, asa ulang kita nggeut mendobo kepeng dengan jelma, barang memaing akkal becuk mengelancung binaga, kennah pegandaen ukurta ngo harta dengan jelma janah sijamotenken.

Patien Pesibahken

Ulang ko nggeut sibihi rana siso tuhu meradepken dengan jelma.

Mike Lapatna ?

Bageen ngo : Kennah ikebiari ukurta Debata, janah ngkelleng atenta baNa, asa ulang kita nggeut menjamjami dengan jelma barang menakiken barang menguratngurati mengkurangi sangapna, kennah niampinen ngo dengan jelma, kum mak ntangkas deng nibettoh ssalahna, pellin lagu merandal i ngo mahan rananken.

Patien Pesipuluhken

Mak ndorok takinken ukurmu bages denganmu, mak ndorok takinken ukurmu sinibages denganmu, barang na posona anak laki, barang naposona perempuen, barang lembuna barang kudana, barang kade pe ugasen denganmu.

Mike Lapatna ?

Bageen ngo : Kennah ikebiari ukurta Debata, janah kennah ngkelleng atenta baNa, asa ulang kita nggeut maing akkal mengukurukuri ugasen dengan jelma dekket ugasen tading tadingen  empungna, siurupenta ngo kalak i menjamotken sinasa ugasenna, Tambahna i mak ndorok sirang-sirangenta sinibages.